Започнува првиот курс на ВЕЗИЛКА со сесијата „Вовед во ВИ“
На 29 септември 2026 год., ВЕЗИЛКА ќе го организира бесплатниот вебинар „Вовед во ВИ“, наменет да ги претстави основите на вештачката интелигенција на јасен, практичен и разбирлив начин, достапен за сите. Вебинарот ќе се одржи од 10:00 до 13:00 во амфитеатарот на Факултетот за информатички науки и компјутерско инженерство (ФИНКИ), УКИМ, во Скопје, како и со можност да го слушате онлајн.
Предавачи на сесијата се проф. д-р Андреа Кулаков и ас. м-р Елена Атанасоска кои ќе ги запознаат учесниците со тоа што претставува вештачката интелигенција, како ВИ-системите учат од податоци, каде ВИ може да биде корисна и кога човечката проверка останува неопходна. Преку примери од секојдневието, кратки квизови и практични вежби, учесниците ќе имаат можност да ги истражат основните концепти на ВИ на едноставен и разбирлив начин, без потреба од претходно техничко знаење.
Вебинарот е првиот од трите сесии во рамки на „Писменост за ВИ за сите“, првиот курс што се реализира преку програмата за обуки на ВЕЗИЛКА. Во следниот период ќе следуваат и дополнителни курсеви од различни области на вештачката интелигенција, создавајќи нови можности за учесниците континуирано да ги надградуваат своите знаења и практични ВИ-вештини. Следете ги мрежите на ВЕЗИЛКА и платформата за обуки за претстојните курсеви и новите можности за учење.
Учеството е бесплатно и отворено за сите, но регистрација на платформата за обуки на ВЕЗИЛКА е задолжителна. За да учествуваат, заинтересираните треба најпрво да креираат корисничка сметка на train.vezilka.ai и да се пријават на курсот.
Регистрација и пријавување: https://train.vezilka.ai/course/index.php?categoryid=3
Упатство за регистрација и најава: https://vezilka.ai/wp-content/uploads/2026/09/upatstvo-za-najava-train-vezilka-ai.pdf